România, di la relaxari la vacţinari
Ştefan Stoica, 02.06.2021, 13:31
Părinţălli a cilimeañiloru di 12 añi şi ma mări pot s’lă duruseasc a aluştoru nai ma buna dhoară ţi easti di căuli tru aestu kiro: un vacţinu antiCovid. Di ñiercuri, 2 di cirişearu, serlu di la Pfizer poati s’hibă administratu tru România tră aestă parei di ilikie. Platforma di programari fu optimizată şi da izini ti programarea-a cilimeañiloru pritu contul a părinţăloru. Schema di vacţinari şi turliili di programari suntu idyealui cumu easti la populaţia adultă, ama tru cazlu a cilimeañiloru easti obligatorie tra s-aibă aprukeari di la părinţă ică di la tutorili legalu.
Studiili fapti spunu unu profilu di siguranţă şi ună tolerabilitati multu buni, a deapoa hăirea fu pănu di mardzină. Tru gruplu a cilimeañiloru cari fură vaccinaţ nu s’nreghistrară cazuri di COVID-19, comparativu cu pareia-a cilimeañiloru nivacţinaţ. Di altă parti, ritmolu a vacţinarillei tru România scădzu andicra di kirolu anda năstriţea 100.000 di persoani imunizati cathi dzuuă.
Di itia că vrearea ti vacţinare scădzu easti ună furñie alithea di găilipseari, lugurseaşti ministurlu a Sănătatillei, Ioana Mihăilă. Vără turlie n’aştiptamu căţe ari unu proţentu, ună parti a bănătorloru cari spunea vrearea tra s’vacţineadză şi agiumsi s’vaccineadză, ari ună parti a bănătorloru cari ari ananghi di ună hăşti ta s’agiungă la vacţinari şi minduescu că aoa himu tu aestă oară, la aţea parti a bănătorloru ţi au ananghi ti vără hăşti i vacţinlu să-lli hibă multu aproapea şi multu lişoru disponibilu, spusi ministurlu a Sănătatillei la un postu privatu di televiziuni.
Ea cundille că acţeslu la vacţinu numata easti ună prublemă, maş, vahi, tru locărli di la hoară cama dipărtoasi, iu niţi yeaturlu di familie nu ahurhi s’vaccineadză. Tru alanti locări ditu văsilie, ama, acceslu la vacţinu easti lişoru, ama oamiñilli vahi au ananghi di kiro ta s’apufusească, yini cu minduita ministurlu Ioana Mihăilă. Ea cundille că autorităţli zburăscu cum potu s’hibă mutati ună parti ditu resursili umani ditu Sănătati ditu căsăbadz tru hori ta s’crească şi aclo rata di vacţinari.
Tu zănatea di yeatru, Ioana Mihăilă cundilleadză tră vaccinari şi să spuni căndăsită că nu ari, aşi cumu suntu aspăreaţ născănţă, efecti pi kiro lungu a serlui, alliumtrea suntu incontestabili efectili pi kiro di mesi şi lungu a triţearillei pritu infecţie. Vrearea tră imunizari scădzu, maratoanili a vacţinarillei nu mata aduc harauuă tră aestu lucru, a deapoa praglu pi cari ş-lu avea pripusă autorităţli, 5 miliuñi di vaccinaţ până la 1 di cirişaru, nu fu agiumtu. Di altă parti, ritmolu a infectărloru armăni multu scădzutu.
Di marță, 1 di cirisaru, România intră tru ună nauă hopă di hăbiniseari a restricţiilor. Năpoi pot să s-facă andamusili privati, competițiili sportivi potu să s’dizvărtească cu spectatori și tru locări ncllisi, s’dişcllidu diznău cluburli și discoteţli, ama și locurli ti agiucari și piscinili di năuntru. Numirlu a participanțăloru easti limitatu, ama poati s’hibă ma mari cara tuţ suntu vacţinaţ. Tutunăoară, activitățli culturali va s’poată s’hibă orgañizati tru spații dişcllisi cu nai cama multu ună ñille di oamiñi. Neise, prusupida di protecție poate s’hibă eliminată la loclu di lucru tru spații ncllisi iu au huzmeti nai cama multu 5 inşi, cu condiția ca aestă s’hibă acutotalui vaccinaţ.
Autoru: Stefan Stoica
Armânipsearea: Taşcu Lala
