Isăki mutrinda vaccinarea
România ș-pripusi năi ținte mutrinda vaccinarea anti-coronavirus, după ţi născănti di ma ninti fură ratate di itia-a reticențăllei di partea a bănătorloru. Comitetlu Naţional di Coordonare a Activităţlor mutrinda Vaccinarea spuni tora că ari ca obiectiv imunizarea cu prima doză a 2 miliuñi di oamiñi până tu bitisita-a aluştui an (tra s’agiungă la 45% ditu populaţie), a diapoa 70% ditu populaţie s’hibă vaccinată până tru primlu trimestru a anlui 2022. Diclarațiile yin după muabeţ anamisa di specialiști români și ali Organizație Mondială a Sănătatillei, cu scupolu ta s’află cearei tra s’dănăsescă criştearea cabaia multu a cazurlor severe şi a morțălor di COVID-19 ditu România. Năulu optimism a autoritățlor sanitare di București easte temperatu ama di OMS, cari estimeadză că, ma s’hibă ţănutu ritmolu di vaccinare ditu aesti 6 stămâñi ditu soni şi strategiile di vaccinare ditu aestu kiro tu practico, România va s’agiungă tăş tru aproximativ 7 meşi la ună anvăleari vaccinală di 40% ama tră populaţia totală şi tru aproximativ 31 di meşi la ună anvăleari di 70%. Cu tuti aestea, OMS veadi ună creaştire constantă tru treillli stămăñi ditu soni tu aţea ţi mutreaşti vaccinarea, maxusu tu arada a persoanilor sumu 50 di añi.
Eugen Coroianu, 20.10.2021, 12:06
România ș-pripusi năi ținte mutrinda vaccinarea anti-coronavirus, după ţi născănti di ma ninti fură ratate di itia-a reticențăllei di partea a bănătorloru. Comitetlu Naţional di Coordonare a Activităţlor mutrinda Vaccinarea spuni tora că ari ca obiectiv imunizarea cu prima doză a 2 miliuñi di oamiñi până tu bitisita-a aluştui an (tra s’agiungă la 45% ditu populaţie), a diapoa 70% ditu populaţie s’hibă vaccinată până tru primlu trimestru a anlui 2022. Diclarațiile yin după muabeţ anamisa di specialiști români și ali Organizație Mondială a Sănătatillei, cu scupolu ta s’află cearei tra s’dănăsescă criştearea cabaia multu a cazurlor severe şi a morțălor di COVID-19 ditu România. Năulu optimism a autoritățlor sanitare di București easte temperatu ama di OMS, cari estimeadză că, ma s’hibă ţănutu ritmolu di vaccinare ditu aesti 6 stămâñi ditu soni şi strategiile di vaccinare ditu aestu kiro tu practico, România va s’agiungă tăş tru aproximativ 7 meşi la ună anvăleari vaccinală di 40% ama tră populaţia totală şi tru aproximativ 31 di meşi la ună anvăleari di 70%. Cu tuti aestea, OMS veadi ună creaştire constantă tru treillli stămăñi ditu soni tu aţea ţi mutreaşti vaccinarea, maxusu tu arada a persoanilor sumu 50 di añi.
Uidisitu cu unu comunicat, 92% ditu decesile ditu România au fură nregistrate la persoanele nevaccinate. Nai ma multi ditu aestea avură si alti lăngori, ama fură nregistrate decese şi tru arada-a tinirloru, cilimeañiloru şi ali populaţie active. România easti pi penultimlu loc tru Uniunea Europeană tru aţea ţi mutreaşti rata di imunizare (anvărliga di 30 %) și multu sumu rata medie mondială. Văsilia s’ampuliseaşti cu patra dalgă a pandemiillei multu ma fuviroasă, di itia a variantăllei Delta a coronavirusului. S’dukescu și adgheafuri mari di la un giudeţu la alantu, zonili ditu nord-est şi sud avânda ună anvăleari vaccinală ma ñică. Pi grupi di ilikie, isăkili spunu ună imunizari di aproximativ 50% la persoanili cu ilikiili anamisa di 50 şi 69 di ani, ama maş anvărliga di 20% la persoanili cu ilikia di pisti 80 di añi. Ari, tutunăoară unu declaju di gen, mllerli hiinda semnificativ ma puănu vaccinati andicra di bărbaţ, cu unu adgheafuru di aproapea 20% la persoanele di pisti 60 di ani.
Comitetlu Naţional di Coordonare a Activităţilor mutrinda Vaccinarea pricunoaște că imunizarea tru populaţia generală easte scădzută şi dănăseaşti, hiinda sumu media regională, ama nu spuni și cum ș’pripuni s’alăxească situația. OMS dimăndă că easte importantu ca România s’aibă tu prota thesi furnizarea-a vaccinurilor cari ascapă bana a aţiloru cari au nai cama marli riscu di decesu şi turlii greali a lăngoarillei, cum suntu tricuţlli, persoanili cu lăngori croniţi şi alte categorii la riscu – persoanili gravidi și personalu cari activeadză tru dumenii esenţiali.
Autoru: Eugen Coroianu
Armânipsearea: Taşcu Lala
