Debaturi mutrinda plafonarea a facturlor la energie
Mihai Pelin, 17.01.2022, 13:14
Tru Romania, facturli la gaze și energie electrică plăscăniră tu meşlli ditu soni, iara tru născănti cazuri criscură nica și di 4-5 ori. Aesta acă, tru sumedru, fu adoptat unu nomu uidisitu cu cari, tru perioada 1 brumaru 2021- 1 apriiuru 2022, păhălu di bitisită facturat ali energie electrică easti plafonat la nai multu 1 leu/kWh, iara aţelu a gazilor naturale la nai multu 0,37 lei/kWh. Ma multu, tut tru aestu nom ari și ună compensare a facturlor di energie electrică și gaze naturale tră consumatorlli casniţ cu condiția că elli s’agiungă tu născănti limiti di consum. Nomlu a plafonarillei şi a compensarillei la energie va s’hibă alăxitu di Guvern, spuni ministrul ali energie, Virgil Popescu, aţea turlie că furnizorllii cari feaţiră isapea alătusită ti facturile, ignoranda nomlu, s’li adară diznău fără penalităţ. Easti acăţată tu isapi criştearea a compensaţiillei tră factura di gaze și va nu va s’da izini ti debranşarea a consumatorlor. Ma multu, Executivlu ari naeti s’acţioneadză şi tră zona di industrie alimentară şi agricultură.
Virgil Popescu “Va să zburămu di la 1 di şcurtu ti un pachet tră industria alimentară și agricultură. Va s’putemu să zburămu, eventual, ti ună suplimentari a discountului la gaze naturale, ică s’criştemu discountul di la 33 la 50% ică scădem TVA-ul tră gaze. Aflămu soluţii di la 1 şcurtu şi 1 di apriiuru cum va s’ducă aestă schemă.” Criza a facturlor adusi reacţii di partea a liderlor di la guvernare – PSD şi PNL. Fură lansate stepsuri unu alantu şi căftări di demisie tră conducerea a Ministerlui a Energiillei şi Autoritatillei Naţionale tră Reglementare tru domeniu, ama şi pripuniri tră apridunarea a catandisillei. Social-democraţllii suntu niifharistusiţ di nomlu iniţiatu di PNL ti compensarea a facturilor şi plafonarea a păhadzloru la energie, iar boţ ditu partid căftară nica şi demiterea al Virgil Popescu.
Liderlu PSD, Marcel Ciolacu declara că voru băgari cearei iruşea, cum va s’hibă plafonarea TVA la energie şi gaze naturale, ama şi organizarea a unei şedinţe a CSAT. Marcel Ciolacu “Easti dealihea că him tu mplină criză. Minduescu că lumea aşteaptă di la aestă coaliţie, cari ari ună majoritate confortabilă tru Parlamentul a Româniillei, aşteaptă cearei, nu tu 1 di apriiuru, li aşteaptă ună-ş-ună.”
Di alantă parte, prezidentulu a PNL Florin Cîţu spune că muabeţli pi aestă temă lipseaşti s’hibă ma pragmatiţi, fără mesaje populiste şi cearei cari au impact mari ti bugetu. Florin Cîţu “Va li spunu ca ti amprotusea. Nu putem să zburămu di misuri cari s’discrimineadză I s’tăximu că va s’păltimu tuti facturli a tutăloru, s’tăximu lenu turlii di eliminări di taxe. Echilibrili ţi li amintămu tu añilli ditu soni tru economie va li kiremu multu lişoru.” Sindicatele și Patronatele cftă și eale plafonarea a facturilor la energie şi gazele naturale, emu tră consumatorlli casniţ, emu tră operatorllii economiţ și fac tombihi că, fără misuri sistemiţi şi unitare, multi firme va s’da falimentu.
Autor: Eugen Coroianu
Armânipsearea: Taşcu Lala
