Nicuşor Dan amintã alidzerli prezidenţiali ditu România
Independentul Nicuşor Dan amintã alidzerli prezidenţiali ditu România. Dimarhulu gheneralu a Bucureştiului, Nicuşor Dan, candidat independentu, amintã alidzerli prezidentiali ditu România. El amintã ma multili ditu voturli misurati di Autoritatea Electorală Pirmanentă, ditu cratu şi ditu xinãtati.
Tașcu Lala, 19.05.2025, 10:31
Independentul Nicuşor Dan amintã alidzerli prezidenţiali ditu România.
Dimarhulu gheneralu a Bucureştiului, Nicuşor Dan, candidat independentu, amintã alidzerli prezidentiali ditu România. El amintã ma multili ditu voturli misurati di Autoritatea Electorală Pirmanentă, ditu cratu şi ditu xinãtati.
Nicuşor Dan amintã aproapea 54% ditu voturitru doilu turu di scrutinu a alidzerloru prezidentiali. Pi doilu locu agiumsi George Simion, candidatlu ali Alianţã trã Unirea Românilor, cari amintã aproapea 46%.
Ti doilu turu di scrutin votarã cama di 11,64 miliuñi di români, di tuţ aeşţã 1,64 miliuñi suntu tru xinãtati.
Hiritiseri tru alidzerli prezidentiali! Deadunu va li anvãrtuşimu apunţãli anamisa di aţeali dauã mealuri a Prutlui – și va s’vigllemu calea europeană, iriñea și dimucrația. Nidzemu ninti, cu pistipseari şi nãdie, pitricu hãbari prezidentulu ali Republicã Moldova, Maia Sandu. Premierlu ali Republica Moldova, Dorin Recean, pitricu hiritiseri ti Nicuşor Dan trã alidzearea ti ipotisea di Prezidentu ali Românie. Chișinău și București – deadunu trã un yinitoru europeanu, tru irini și elfterisiri, ngrãpsi Recean.
Prezidentulu PSD, Marcel Ciolacu, ãlu hiritisi, dumãnică dicsearã, Nicuşor Dan trã amintaticlu tu alidzerli prezidentiali, dimãndãndalui că româñilli spusirã diznãu a lumillei că, tru sticurli di oarã nai ma greali, au şteari tra s’treacã ma largu pisti adgheafuru şi s’hibã adunaţ stogu dininteaa piriclliului. ‘Îlu hiritisescu Nicuşor Dan trã victorie şi îlli hiritisescu maxus româñilli ditu cratu şi ditu diaspora, trã aţea că vinita-a loru la votu va-lli da a yinitorlui prezidentu unã ma mari axie. Româñilli scoasirã tu migdani, dizãu dinintea a lumillei cã, tru sticurli di oarã nai ma greali, suntu axi s’treacã ma largu pisti adgheafurli economiţi, suţiali i cã şi ateali politiţi adunaţ stogu dinintea a piriclliului’, angrãpsi Ciolacu, pi frãndza a lui di Facebook. El cundille că rezultatlu a alidzerloru spuni că ‘România ari ananghi di achicãseari unu-alantu şi di reconstrucţie’.
Prezidentulu PNL Bacău, Mircea Fechet, ministru a Fisillei, spuni că rezultatlu amintatu di Nicuşor Dan la alidzerli prezidentiali suntu “unã sărbătoare trã dimocraţia ditu România’ şi ‘unã victorie a românilor cari nu chirurã pistipsearea cã averlu, nãmuzea şi buna achicãseari angreacã. ‘Easti unã sărbătoare trã dimocraţia ditu România: avem un prezidentu proeuropeanu, Nicuşor Dan, a curi ãlli deadimu adzã, ahãtu mulţã di noi, bãnãtorlli, pistipsearea-a noastră tru un yinitor ţi s’acaţã calea limbidã, europeană. Easti unã victorie a românilor care ş-chirurã pistipsearea cã averlu, nãmuzea şi buna achicãseari angreacã şi suntu ma vãrtoasi atumţea cându n-adunãmu anvãrliga aluştoru, adunaţ stogu ti unã Românie tiñisitã’, angrãpsi Fechet, dumãnică dicseară, pi Facebook.
Liderlu UDMR, Kelemen Hunor, ãlu hiritisi, dumãnică noaptea, Nicuşor Dan, cundillinda că maghiarlli ãlu votarã tu numiru mari nãulu prezidentu ali Românie. ‘Hiratimati pitrecu ditu geanlu a melu ti Nicuşor Dan! Maghiarlli votarã tru numiru ali Românie, emu tu cratu, emu tru diaspora. Aestu rezultat mi hãrseaşti multu şi escu multu pirifanu di comunitatea-a noastră! Nãpoi, scoasimu tu videalã, cã tu sticurli di oarã greali n-adunãmu stogu, bãgãmu besã unu-alantu’, angrãpsi Kelemen Hunor, pi frãndza a lui di Facebook.
Nicuşor Dan spuni vrea ta s’aibã unu Guvern cu unã largă majoritate tru Parlamentu, ditu cari s’facă parte şi Uniunea Salvaţi România, şi cu Ilie Bolojan premieru, declarã, dumãnică, prezidentulu interimar ali USR, Dominic Fritz. El cundille că USR andrupaşti pripunirli.
Autoru: Eugen Cojocariu
Armãnipsearea: Taşcu Lala
