Purtarea ti sigurlãkea-a bãnãtorloru tru Delta-a Dunãllei
Bãnãtorlli a niscãntoru hori ditu România furã purtaţ, ti sigurlãki, trã prota oară, tru hãvaia-a polimlui nkisitu di Rusia tu Ucraina.
Tașcu Lala, 18.11.2025, 22:56
Autoritãţli române apufusirã purtarea ti sigurlãki a bãnãtorloru di la dauă hori ditu Deltă, ţi suntu aproapea di sinurlu cu Ucraina, după ţi unã pampori nturţească cu gazu petrolier lichid (GPL) s’apreasi dupu agudearea cu droni arusești aprindu luni. Hiindalui piriclliu mari di explozie, a bãnãtorloru lã si pitricurã hãbãri Ro-Alert. Uidisitu cu autoritãţli, ma marea parti di bãnãtori puturã tra s’poartã, iarapoi alanţã furã purtaţ cu tehni di la Inspectoratlu ti Catandisea di Ananghi. Dimarhia a Muniţipiului Tulcea ndreapsi ti bãnãtorlli ţi eara purtaţ cama di unã sută di locãri di durñeari tru patru internate a nãscãntoru unităţ di nviţãmiintu.
A deapoa, forţãle a Catandisillei di Apărari pusputirã locãrli tru cari putea s’aibã piriclliuri di itia atacãllei aruseascã. Uidisitu cu Inspectoratlu trã Catandisi di Ananghi Tulcea, aproapea di loclu iu ari piriclliu va s’aibã ma largu forţi di intervenţie tra s’veaglle cu ngãtanu catandisea. Ma s’hibã di s’agiundzi pi unã halã greauã, tu ananghi icã alti catandisi uruti, echipajili suntu ndreapti s’llia meatri ntrãoarã tra s’ñicureadzã zñiili – dimãndã Inspectoratlu.
Tu aţeali locãri dusirã ma multi autospeţiale trã purtarea victimili, autospeţiale trã purtarea oamiñilli ţi au problimu cu sãnãtatea, autospeţiale ti astindzeari, ama şi microbuze. Tu arada a lui, șeflu a Departamentului trã Catandisi di Ananghi, Raed Arafat, spusi că lipseaşti s’hibã faptã isapi, neise tuti sţenariili pãnu di astindzearea a marlui focu. Uidisitu cu nãsu, ari cãbili di tindeari foclu pi unã aradzã di 4-5 km, simfunu cu isãkili fapti di experţã. Când riscul va s’ñicureadzã şi numata ari piriclliu, oamiñilli va s’toarnã acasă – dădea asigurări aestu. Di, marțã, oamiñilli ahurhirã s’toarnã tu casili a loru.
Inspectoratul trã Catandisi di Ananghi (ISU) Delta dimãndã că serviţiile di ananghi şi di intervenţie ucrainene loarã meatri tra s’ñîcureadzã zñiili fapti la pamporea zñiipsitã di atacurli ali Rusie, hiinda ñicuratu cabaia piriclliulu ti unã catandisi di ananghi cu zñii multu mãri tu horli ditu viţinatã.
Exploziile fapti di itia a atacurior cu drone di pi mealu ucrainean a Dunãllei s-avdu totna şi vãrtosu pi mealu românescu tru añilli ditu soni. Easti, ama, trã prota oară cându bãnãtorlli a niscãntoru hori ditu România suntu purtaţ tu sigurlãki, tora cãndu easti polimlu nkisitu di Rusia tru Ucraina. Kiro di aproapea doi ani, dronili arusești cãlcarã spațlu aerianu românescu, a deapoa askerea nu lo meatri. Tãş tora, tu aestã primvearã, după meşi di dzãli di anda s’bãgã zori publicã și cu inţidentili fapti ma multi ori tru Delta a Dunãllei, autoritãţli di București vulusirã un nomu cari da izini ti surparea-a loru.
Autoru: Daniela Budu
Armãnipsearea: Taşcu Lala
