Protlu studiu românescu mutrinda hăirlătica-a vaccinurloru

Mihai Pelin, 18.08.2021, 12:29

Pandemia di COVID-19 nica aduţi probleme la nivelu mondialu. Organizaţia Mondială a Sănătatillei feaţi timbihi că lumea easti tu piriclliu s’keară alumta contra-a coronaviruslui. Di itia a năiloru lumăki, ama şi alţă factori, multi stati va s’aibă diznău ună plăscăneari a fucuriniloru. Ma ghini spusu, viruslu s’arăspândeaşte ma largu nica şi tu hăvaia a curmarillei restricţiili mutrinda urdinarea şi adunărli, a nitiñisearillei meatrili di siguranţă, ama şi a acceslui inechitabilu la vaccinuri. Tru România, autoritățle spun că imunizarea armâni atea ţi da di mănă ca ună cearei di aviglleari contra-a coronaviruslui. Coordonatorlu ali campanie națională di vaccinari, yeaturlu militar Valeriu Gheorghiță, părăstisi prota analiză preliminară a datiloru mutrinda hăirlătica-a vaccinarillei contra COVID-19. Uidisitu cu datili prezentate, persoanili vaccinati suntu cama afiriti contra a lăngoarillei şansili ca eali s’adară ună turlie greauă hiinda multu ma ñiţ.

Studiulu spuni că hăirlătica tra prevenirea infecțiillei easti di 90%. Tutunăoară, unu insu vaccinatu complet easti di 10 ori ma afiritu andicra unu ţi nu fu vaccinatu. Tru atea ţi mutreaşti hăirlătica contra spitalizarillei, ună singură doză di vaccinu, la ma multu di 14 di dzăli di la administrari, ari ună eficiență di 67%, eficiență cari creaști la cama di 92% tru cazlu tru cari zburămu ti schemă completă di vaccinare. Ase, ună persoană vaccinată cu dauli doze ari un risc di 12 ori ma ñicu ta s’agiungă tru spitalu. Nu ma puţănu importantu, uidisitu cu studiulu, imunizarea scadi di 14 ori riscul di moarti, hăirlătica hiinda di cama di 93% la persoanili vaccinate cu schemă completă. Informațiile fură adunati tu unu kiro di patru meşi, ditu meslu şcurtu până tu bitisita-a meslui mai. Datili ditu alte văsilii spunu că hăirlătica-a vaccinurlor armăni la cama di 90% și tru cazlu a lumakillei indiană Delta, atumţea cându zburămu ti prevenirea-a spitalizărlor, a turliiloru greali și a aţiloru ţi muriră- nica spusi Valeriu Gheorghiță.

Tu ahurhita-a aluştui mesu, uidisitu cu AFP, giumitati ditu populaţia Uniunillei Europene eara vaccinată cu schema completă contra COVID-19. Ditu ateali 27 di stati membri, 13 avea năstricută, praglu di 50%, după modelu a aţiloru nai cama populate patru state ditu bloclu european: Spania (58%), Italia (54%), Franţa (53%) şi Germania (52%). Nai cama mări procente di populaţie completu vaccinată eara tru Malta (74%) şi tru Belgia (59%). Tu alantu capu a clasamentului eara, multu alargu, Vărgăria (14%), antricută maş di România, iu, tu aestă oară, maş puţănu pisti 5 miliuñi di oamiñi suntu acutotalui vaccinaţ. Până tru aestu kiro, patru vaccinuri anti-COVID-19 suntu aprobati tru UE: Pfizer-BioNTech, Moderna, AstraZeneca-Oxford şi Johnson&Johnson. Ma multu andicra di aesta, Ungaria şi Slovacia ufilisescu şi seruri niaprobati, toradioară, di Agenţia Europeană tra Medicamente, dizvultate tru Rusia şi tru China.

Autoru: Mihai Pelin

Armânipsearea: Taşcu lala