Româñil’i şi urdinărli
Româñil’i vrurâ an sâ-și treacâ vacanțili tu vâsilie, iara România easti pi protlu loc tu Uniunea Evropeanâ dupâ ponderea a urdinărilor di nuntru.
Tașcu Lala, 31.10.2026, 21:26
România avu tu 2025 nai ma marea proporții a urdinărilor di nuntru dit tuti vâsiliili membri ali Uniuni Evropeanâ. Datili Eurostat dit soni aspun că 89% dit urdinărli turistiți adrati di rezidențâl’i ali Românie an avurâ destinații naționali. Țifra easti pi scâdeari cu un proțentu andicra di datili di anlu di ma ninti.
Uidisit cu statistițili di nuntru, Capitala și alțâ câsâbadz reședințâ di giudeț furâ multu vruti ti city-break-uri și ti trițearea a chirolui adyi.
Tu astrițearea naționalâ Destinația a Anlui 2025, podiumlu la categoria di câsâbadz lu avu Oradea (loclu 1), dapoaia Sibiu (loclu 2) și Brașov (loclu 3). Delta a Dunâl’ei amintă Marli Premiu, hiindalui aleaptâ ca nai ma di simasie destinație turisticâ a anlui bircheavis a mușutețlor naturali. Iara mealu românescu di la Amarea Lai armasi protlu pol estival/di vearâ. Stațiunili montani și balneari/hâmami furâ și eali iarapoi multu vruti.
Ama s-nâ turnăm la datili Eurostat, clasamentul di estan ș-aduți cu ațel dit 2024. Ași, pi doilu loc fu tot Spania, iu urdinărli di nuntru furâ 87% dit total. Gârția, Galia (Frânția) și Portugalia avu cathi unâ 85%. A că la scarâ evropeanâ, turismul di nuntru fu cama marea parti a câlâtoriilor adrati an, hărgili ti urdinărli tu xeani furâ ma mări di hărgili ti urdinărli di nuntru. Di alantâ parti a clasamentului furâ Luxemburg, Belgia și Malta. Datili scot tu padi ponderea a urdinărilor di nuntru tu totallu a câlâtoriilor, iara nu numirlu absolut di vacanți adrati di oamiñil’i ți bâneadzâ tu cathi crat.
Tu ți mutreaști numirlu di vacanți, rezidențâl’i ali Uniuni Evropeani adrarâ, an, 1,2 miliardi di câlâtorii cu scupo personal ică profesional, cu 1,4 proțenti ma multi di anlu 2024, ațea ți va s-dzâcâ vârâ 17 miliuni di urdinări artimai. Dit eali, 848 di miliuni avurâ destinații tu vâsiliili di reședințâ a turișțâlor, alti 264 di miliuni di câlâtorii furâ adrati câtrâ alti craturi membri ali Uniuni Evropeanâ, iara ți armasi, tu vâsiliili di nafoara ali UE. Ași, uidisit cu datili Eurostat, cama multili urdinări a rezidenților UE s-feațirâ nuntru, tu bloclu comunitar.
Datili aspun nica că, evropeañil’i, a că urdinarâ ma multu tu vâsiliili a lor an, urdinărli tu xeani s-feațirâ, di arada, cu hărgi ma mări, – aproapea 380 di miliardi di evradz ti urdinărli di nafoarâ. Ma s-adrăm biani, urdinărli di nuntru, tu vâsiliili a lor, s-feațirâ cu hărgi niheamâ pisti 266 di miliardi di evradz. Em ti urdinărli di nuntru, em ti ațeali tu xeani, cazarea și transportul furâ cama mărli hărgi ti evropeañi – aspun nica datili Eurostat.
Autor: Daniela Budu
Apriduțearea: Mirela Biolan
