In Memoriam sculptorlu Dumitru Pasima (1935-2022)
Artista Lila Passima, nipoata a marilui sculptoru armânu Dumitru Pasima nă deadi hăbarea lae pi FB că a llei lali şi a nostru durutu artistu ţi nă hărsi cu a lui lucrări sculpturali di mari simasie dusi la Aţelu di Analtu tru 9 di agustu 2022.
Tașcu Lala, 11.01.2023, 14:04
Artista Lila Passima, nipoata a marilui sculptoru armânu Dumitru Pasima nă deadi hăbarea lae pi FB că a llei lali şi a nostru durutu artistu ţi nă hărsi cu a lui lucrări sculpturali di mari simasie dusi la Aţelu di Analtu tu 9 di agustu 2022.
Lila Pasima:
“Dumitru Pasima — Tache tră familie şi aprukeaţ, Pasima tră soţlli di zănati — spusi aieri (9 di agustu 2022n.n.) oară bună a unăllei lumi pi care el numata u dukea că-lli easti aproapea. Cu ună seriozitati şi unu purtaticu aproapea asceticu andicra di zănatea a lui, ti cari spusi mari miraki pănu tu bitisita a banăllei cu ună cilăstăseari niacumtinată, sertu tru prinţipii şi un pedagogu aretcu, cu ună akicăseari ahănda a substanţăllei lăuntrică a sculpturăllei şi ună mutrită morală tu ţi mutreaşti minarea a noastă tru lumi, Dumitru Pasima durusi a sculpturăllei şi a artăllei româneşti ună ñică lumi mari, pi cari ma s’ai tihe s-u aflli şi să u vedz va u ţăñi minti, neise tu a tali mindueri şi cu harauuă tru inima a tauă.
Tră aţelli cari nu avură tihea să-lli cunoască ñica lumi mari pilkisită, pirmitusită tru ună expoziţie şi tru un catalogu, Dumitru Pasima fu un artistu a curi cilăstăseari ari explorată pi hiotea a kirolui cămpulu a sculpturăllei clasică, adăvgânda-lli elementili a spiritualitatillei ditu lumea embistimenă şi construinda ună sinteză formală aprukeată di lumea greco-romană, di culturli mediteraneani și bizantini. Ufilisinda sistemlu de semnificații și simboluri ditu lumea tradiționalu criștină, cu izvuri de inspirație ditu arta huryitească și cultă autohtonă, ama și a locurloru ditu Balcani, Dumitru Pasima thimilliusi ună sculptură monumentală epurată de accesorii decorative și descriptive, transfigurânda seamnili a lumillei figurative tru ună poetică a geometriillei spațlui sacru (Poarta, Veghe, Sacrificiu, Mioritica, Scara, Pieta, Mama și Fiul, Zbor, Intrarea tru Paradis,etc.). Nu idyiulu lucru lu avu tru scupo tru arta a portretlui, iu atenția a lui s’ndriptă cătă frimtarea și pilikisearea expresivă a materiillei, ca ună ciudie cum zuyrăpsi expresia a prosuplui până la ateali ditu soni minutişuri ţi u scot utu videală identitatea, dânda aestă turlie ti imaginea figurativă ună materialitati și ună plastiţitati ţi lu apruke di arta a portretlui roman.
Lumea a atelierlui artistului scoati tru videală fragmentaru contextulu culturalu și suţialu tru cari amintă axie și ș-lu cundille demersulu artistic ahurhinda cu protili tăburi di sculptură di Măgura, Căsoaia și Arad, şi până la creațiili a añiloru ditu soni ahărdziti ti explorarea a portretlui și a monumentilor di for public”.
Dumidză s-lu lliartă tru iriñe ! Arăpasu lişoru tru Paradhisu !
Cu virinu,
Secţia Armânească di la Radio România Internaţional
