Asiguripseri guvernamentale mutrinda resursele
România va saibă gaz şi yipturi ti consum, da asiguripseri prim ministrul Nicolae Ciucă.
Ştefan Stoica, 23.07.2022, 17:02
Petrolul easti ti păradz, gazlu easti ti geopolitică, diclara, tora ayoñea, un expertu tru probleme energhetiţi, mutrinda acţiunile ali Rusie tru conflictul dişcllisu – diplomatic, economic şi, tru esenţă, idiologic – cu Occidintul. Moscova năpoi dişcllisi ună ditru conductele pritu cari livra gaz ti Europa, ama Europa akicăsi că numata poati s-bagă besă pi gazul rusesc şi, nai ma puţăn ti ună majoritate calificată a statelor Uniunillei, niţi nu easti etic s-u facă după invazia rusă tru Ucraina. Easti furnîa ti cari UE mindueaşti, di ună parte, să-şi diversifică sursele di aprovizionare şi, di alantă, s’căndăsească statele membre s-ufilisească raţional şi s’economisească energie ti la iarnă.
Perspectiva ñicurarilei consumlu di gaz amintă aduteri aminti duriroase a românilor cari acăţară sbăneadză coşmarul a añiloru ditu soni a dictaturăllei comuniste, când aroarea tru case era cvasigeneral. Vahi ti atea guvernanţăllii abordiază aestu subiect ndilicati cu nădie unu andrupătu, ama di ţifri. Premierul Nicolae Ciucă diclară că tru aestu kiro nu ari asparizmă că România nu va s’aibă gazul anănghisitu ti iarna yinitoare. Tru dipozite easti năstricutu nivelul di 1,6 miliardi di metri cubi, iara planlu pruveadi agiundzearea la 80% din capacitatea di stocari până la 1 di brumaru, cundille prim-ministrul:
Noi lipsea ca până la 1 agustu s’agiundzemu la 46%, 57% la 1 yismăciuni, 66%, cara s’nu am alathusi, la 1 sumedru şi 80% la 1 di brumaru. Aşi cum spunu cifrele di adză, himu pisti procentele asumate şi la bitisita a stămânăllii tricute aveam 200 di milioane di metri cubi pisti aţea ti aveamu tru depozite tru idyea perioada a anlui tricut. Neise, nu ari tru aestăoară niţi ună turlie di asparizmă ca România s’nu aibă gazul anănghisitu ti iarna 2022-2023.”
Misura di ñicurari a consumului, căftată di Uniune, easti una di precauţie, lugurseaşti Nicolae Ciucă. Xerea cronică adusi, ama nica ună provocari majoră, a curi guvernanţăllii suntu anănghisiţ să-lli apăndăsească: mira a culturilor di yipturi. Premierul a deadi, ama, asiguripseri, că ari duri gârnu ti consumul intern şi nica şi tră export. Nu ari itii ti găilipseari niţi la culturile di misuru şi floarea soarelui, spuni Nicolae Ciucă:
Culturile di toamnă s’recoltează tora şi ditu ţifrili ţi li aprukemu rezultă multu limbidu că avem duri gărnu ti consumlu a nostu işiş, ti siminari şi avem gârnu şi ti s’exportămu. Tru ţi mutreaştu cultura a misurlui şi cultura di floarea-soarelui nu ari furñii di găilipseari, di itia că ari pi thimelliulu a datiloru statistice cantităţ duri asi tra s’putem s’avem asigurată hrana”.
Easti borgea a cafi unlui guvern s’cilăstăsească ti asigurarea hranăllei, căldurăllii şi a energiei pi kiro di iarnă ti cetăţenii a văsilillei şi aesta adrămu tu aistu kiro, ălli isihăsi premierul conaţionalii.
Autoru: Stefan Stoica
Armânipsearia: Taşcu Lala
