Marica Pitu

Marica Pitu s-amintă tu ună fumeal’i di armân’i farşiroţ dit Gărţii (Machidunia veacl’i) dit pârinţâl’i: Spiru şi Anastasia Pitu. Afend-su s-feaţi Sârunâ, tu fumeal’ia Pitu, iara dadâ-sa s-amintă Katerini, tu fumeal’ia Nicolau.

Fumeal’ia Pitu eara ună cu anami tu isnafea a fărşiroţlor, ţi viniră tu Românii, prota Cadrilater, a dupu 1940, tu Dobrogea veacl’i. Spiru Pitu fudzi tu America, aclo iu avea emigratâ nica dit 1903 unâ importantâ colonie di fârşiroţ, Bridgeport. Dupu ţi lucră chiro di 16 di an’i, el s-turnă tu Românii aclo iu ş-avea alâsatâ taifa. Fumeal’ia Pitu avu ţinţi ficiori, patru di el’i amintaţ tu Gârţii, Katerini, iara Marica, cama n’ica, s-amintă tu Românii. (Dobrogea, Cadrilater).

Marica Pitu bitisi cursurili a Liceului Pedagogic di Timişoara. Ayăpisită di n’ică di muzica popularâ româneascâ şi armâneascâ (cu dhoara ti cântari clirnumisitâ di la afend-su), s-anyrâpsi la Sculia Popularâ di Artâ di Constanţa. Tu 1959 intră solistu vocal tu Ansamblul profesionistu di Cântiţi şi Giocuri “Brâuleţul” di Constanţa, iu yilipsi multu ghini folclorlu dobrogean, român şi armân.

Feaţi parti şi dit pareia “Nunta Zamfirei” di Constanţa, un ansamblu di giocuri a ONT-ului.

Lucră şi ca instructor metodistu la Casa di Culturâ a Sindicatilor di Constanţa, cu borgi ti partea artisticâ. Ca instructor, bâgă thimeliu a pareil’ei di cântiţi şi giocuri ali Casâ di Culturâ iu adusi ş-cântâtori armân’i , adră unâ orchestrâ popularâ, unâ pareii di giucâtori sum cumandul a coregraflui Mihai Vasile.

Fu prota cântătoari profesionistâ di Dobrogea, adră şi aleapsi folclor (cântiţi şi texti) dobrogean şi armânescu.

Cântă sum cumandul a mărlor dirijori a chirolui: Victor Predescu, Ionel Budişteanu, Gheorghe Parnica, Dan Moisescu, Emil Gavriş, cum şi deadun cu mărl’i cântători dit vâsilii: Maria Tănase, Maria Lătăreţu, Rodica Bujor, Mia Braia, Ioana Radu, Irina Loghin, Benone Sinulescu, Angela Moldovan şi mulţâ alţâ.

Feaţi multi volti tu vâsilii şi tu xeani, lo parti la spectacoli, cama multi pi litoral, ama şi tu tutâ Dobrogea, prit horli dianvărliga.

Avu şi inşeri pi televizia românâ, ahurhindalui cu anlu 1960.

Tu anil’i ‘70, multi di cântiţli a el’i furâ pi protlu loc (ma multi stâmân’i arada) tu toplu muzical tipusit tu revista “Stâmâna”.

Cântiţli armâneşţâ di pi aestu CD furâ ânreghistrati cu orchestra Radio di Bucureşti.