Comisia Ivropeană anglliţă proțedura mutrindalui exichea bugetarâ
Comisia Ivropeană anglliţă proțedura di exichi bugetarâ para mari ti Românie.
Tașcu Lala, 04.12.2025, 14:23
Comisia Ivropeană deadi hâbarea, marţâ, că anglleațâ proțedura di exichi para mari ti nauâ vâsilii membri, prit cari și România. Alanti vâsilii suntu Afstria, Belgia, Galia, Mâgiria, Italia, Malta, Polonia şi Slovacia. Dealihea, aesta va ta s-dzâcâ că nu mata va s-llia canâ misurâ tu aestâ aradâ, ama că proțedura armâni dișcllisâ și poati s-hibâ diznău bâgatâ tu practico. Tu veara a anlui ți va s-yinâ, Comisia Ivropeană va s-mutreascâ cu mengâ catastisea pi thimellu a datilor dit 2025 ș-va s-apufiseascâ maca va u filiseascâ diznău ma nu. Scupolu ali proțedurâ di exichi para mari easti sâ-și țânâ statili ali Uniune sum control bugetili.
Contra ali Românie, proțedura fu anchisitâ u 2020, ama ea fu curmatâ tu chirolu ali pandemie, di cara câftărli bugetari ti tuti vâsiliili membri nu mata furâ ași serti, ta s-lâ da izini s-andreagâ cama cu hâiri zñiili ali crizâ sanitarâ. Dapoaia, maca s-asparsi catastisea bugetari la cama multi icunumii ș-di cara criscu ananghea di investiții ivropeani tu domenii cata cum avigllearea a mediului, digitalizari ică apârare, autoritățli di Bruxelles furâ di câbuli cu unâ nauâ scâdeari a sirțâllei a nomurlor fiscali, ți intrarâ tu practico dit meslu apriir, cari pruveadi țânearea a mardziñilor anamisa di borgi și exichea publicâ pruvidzutâ tu tratatili ivropeani (dimi 60% dit PIB și respectiv 3% dit PIB), ama da ma multâ elefterie di lucru ti andridzearea a aspârdzearillei di zigâ. Ta s-poatâ s-hârseacâ di aestu lucru, autoritățli naționali lipseaști s-adarâ un plan axizit ta s-andreagâ exichea bugetarâ și borgea publicâ sum mardzina maximâți easti vrutâ, tu un chiro di patru añi, cari poati s-creascâ la șapti añi, maca va s-acațâ tu isapi reformi și investiții.
România easti, tora di oarâ, pi ațel dit soni loc tu Uniunea Ivropeană, avândalui unâ exichi di 8,4%. Ti ațea, Executivlu comunitar fați tambihi di cara catasisea a vâsilillei easti cu piricllu, dimi angâsâeaști chivernisea s-hibâ cu angâtan şi s-bagâ tu practico misurli di andridzeari fiscală. Pi di altâ parti, reformili tâxiti și niscânti a curi lâ si deadi chiola cali di câtri autoritățli di Bucureşti, a că nu suntu vruti tu vâsilie, eali suntu ghini aprucheati di Bruxelles. Ministerlu român a Finanților tâxi că, bircheavis a anvârtușarillei fiscali ți luyurseaști că easti susto, tu bitisita a anlui 2026 exichea bugetarâ ali României lipseaști sâ scadâ la vârâ 6% dit PIB. Di cara s-adră un progres – dzâți nica ministerlu – Comisia Ivropeană nu pripuni ș-alti jgllioati tu arada a proțedurillei di condiționalitati macroeconomicâ și niți nu pripuni unâ dânâseari a fondurlor ivropeani.
ʺRomânia poati, dimi, s-aibâ nâdie ti ma multu: anvârtușarea a investițiilor publiți, fâțearea ma iruși a proiectilor strateghiți ș-adrarea a unlui cadru fiscal ți s-andrupascâ criștearea icunomicâ ti un chiro lungu. Him cândâsiț s-duțem ma largu aestâ cali ta s-s-andridzem finanțili publiți și s-alâxim progreslu di adzâ, ta s-veadâ România hâiri tu yinitor.ʺ – dzâsi ministrul di Finanți, Alexandru Nazare. Tu idyiul chiro, România va s-da giuiapi ma largu, la cathi 3 meși, ti misurli di scâdeari a exichillei, iara Comisia Ivropeanâ va s-mutreascâ cu angâtan, activ, catastisea a llei fiscal-bugetarâ.
Autor: Roxana Vasile
Apriduțearea: Aurica Piha
