Nicolae Constantin Batzaria s-amintă tru 20 di brumaru 1874, Kruşuva, Macedonia şi tricu tu alantă etă tru 21 di yinaru 1952, București. Fu un prozator și publicistu di fară armânească.
Nicolae Constantin Batzaria (20.11.1874 – 21.01.1952)
Marli umoristu Nicolae Batzaria, easti faptu tu 20 di şcurtu, iara tu meslu brumar ăl’i si arupsi hirlu a banăl’ei tu ună hăpsani comunistă.
Nicolae Batzaria, s-featsi Cruşuva tu anlu 1874. Anvitsa prota la scoala româneasca dit casaba s-dapoia la Liceulu românescu di Bituli. S-ngrapsi la facultatli di Literi ş-Dreptu Bucureşti, ama alâsă înveţlu câ nu avea cu ţi s-bâneadzâ. Ahurhi lucrul di tinir: fu director ş-profesor la şcoala româneasca di Crusuva, profesor la liceulu românescu di Ianina, la liceulu di Bituli, inspector şcolar ti vilaetili Cosova şi-Sâruna, ţi eara atumţea sum turta.
Di itia ca eara un bun politician s-u stea ghini s-limba anturteasca agiumsi senator di Istanbul tu anlu 1908 s-ministru a lucrarlor publiti tu anlu 1912 tu guvernul a Gion’ilor Turta. La anlu 1913, simna di partea ali chivernisi anturteasca Tratatlu di Irini di Londra. Dupu protlu polim mondial vini s-baneadza tu Românie iu u mbratata cariera di publicistu si scriitor.
Nas baga thimel’iu la multi revisti s-gazeti armânesti si colabora s-la multi alti. Scoasi nSaruna prota gazeta armâneasca “Desteptarea” tu anlu 1908. Publica avdzatili “Paravulii” prota tu revistili armânesti a chirolui. Tachi Papahagi al’i scoasi ”Paravuliili” tu volum tu 1935 , tu colectia “Biblioteca Nationala a Aromânilor”, ti nas u ndridzea, dupa ti avea tipusita nascanti di aesti paravulii nica dit 1922 tu cunuscuta a lui “Antologie Aromâneasca”.
Ama ti suntu aesti “paravulii”? Nascanti isturii scurti ti aradeari, ngrapsiti tu stihuri, cari parmatusescu cu mari hazi fapti dit bana a armân’ilor di var chiro s-tu cari autorlu s-aradi di cusururli a armân’ilor: alavdari, s-cljnciami, pirifanji, glarimi, s-alti ahtari. Di alta parti ama, avem s-alta soie di paravulii, tu cari humoristul a nostru scoati tu migdani itsral’ia a armânlui andicra di atsel’i cu cari baneadza deadun: arbinesi, turta, ghifta, gret, varyari etc. Nu suntu alasati nanaparti nitsi mul’ierli cu nascanti di huili a lor, nascanta prefta nu para tin’isits s- multa, multa alta. Cum eali suntu multu pi chefea a armân’ilor cunuscura una mari araspandeari tu comunitatli armâneasti, iu urdinara ma multu pi cali orala , cate mas putsan chiro armân’ili putura s-anveata la scoala ti scriitor’j a lor.
Nicolae Batzaria ngrapsi s-proza, ma multu pi româneasti, ama s-pi armâneasti: schitsi, isturii ti armasira arapânditi tu gazetili românesti ti li cumândusi, ica la cari ngrapsi. Ari scriata s-literatura ti ficiurit s-cumandusi revistili românesti “Dimineata copiilor”, s-”Universul copiilor” iu simna cu pseudonimul Mos Nae, cum s-cu pseudonimi cum Ali Baba, Dinu Pivnicieru, N.Macedoneanu. Easti parintili a personajlui Haplea, soie buna cu Pacala, ica Nastradin Hogea.
Proza scurta, isturiili ica romanili ngrapsiti pi româneasti suntu interesanti maxus tra lumea s-bana balcanica ti li zuyrapseasti cu mari masturlachi.
Nai ma cunuscuta s-vruta opera al Nicolae Batzaria armân “Paravuliili” iu iasi nai ma ghini harea a lui s-cu cari aminta un loc di mari tin’ie tu literatura armâneasca.
Prota versiuni pi româneasti a “paravuliilor” u deadi Hristu Cândroveanu tu antologhia “Un veac de poezie aromâna” ti isi Bucuresti tu anlu 1985.
Multu bun cunuscator a limbal’ei armâneasca s-a suflitlui armâneascu, Nicolae Batrzaria yilipseasti lumea armâneasca antreaga, fara sa-l’i ascapa tiva dit peza, araslu si sicaili a l’ei. Asi cum angrapseasti Nick Balamaci pi frandza di internet iu zburasti ti Nicolae Batzaria “una cultura ti nu poati sa-si arada di ea isisi nu poati sa s-alaxeasca s-una cultura cari nu poati sa s-alaxeasca nu poati s-armâna tu bana tu aesta lumi ayun’iusita. Nicolae Batzaria easti un scriitor cari feati pidimo s-u ascapa di la chireari veacl’ia a noastra adeti adranda sicai cu ea”.
La putan chiro dupa ti comunistil’i u loara putearea tu Românie, fu ancl’is ca eara contra a lor. Muri tu ahapsi tu 20 di brumar 1953, dupa una bana di lucru nicurmat s-di alagari prit tuta Peninsula Balcanica ti fara armâneasca.
Tu anlu 1971 isi Bucuresti un dhiscu cu poezii armânesti, pi cari Matilda Caragiu Marioteanu, academician, u spuni paravulia “Vor s-marita moasili”.
Eitura “Cartea aromâna” u dishcl’isi seria a tipuserlor a lj’i tu anlu 1989, cu “Paravuliili” al Nicolae Batzaria, ca una pricunusteari a popularitatil’i a aistor.
Tu anl’i 2003 ş-2004 isiră Bucuresti două CD-uri pi cari actorlu s-reghizorlu Toma Enache spuni cu mari hazi nai ma cunuscutili di aesti paravulii.
Cărțâ tipusiti:
Ma nghios vruts ascultători vă dâm s-avdzâts:
KITA LA BASEARICA di Nicolae Batzaria
Spune Kita ş-iara spuni,
Iar fărtaţľi de-anvârliga,
Teşi la stani, tuţ lu-ascultă,
Până nʹelu s-lâ si frigă.
Spuni Kita:O lo-ľi tat-su
Ţi nʹi-vidzură ocľii aseară,
Căndu neşu la băsearică
Ca s-aprindu ş-eu nă ţeară.
Ţe-ş-fu mare, bre, bisearica!
Nu sâ spuni câtă-i mari.
Ş-ţi s-vedz nuntru?Thamă,frate!
Iu s-mutreşti,mintea ţ-keare.
Ş-lumi! Lumi cătâ s-cafţâ,
Ş-cănda-i mută, văr nu greaşti.
Maş doi oaminʹi tut s-incaci.
Taţi un, alant zburaşti.
Oi fârtate!, antreb viţinlu.
Aţelʹi doiľi ţi s-vârghescu?
Ţi s-ţâ creapă! el nʹi-u toară,
Nu vedz oarbe? Psăltisescu!
Ş-ia ,di naparti di uşi
Iasi un cu barba mari,
Ş-nişti stranʹi, cum nu-i vârnu.
S-lu-afli noaptea, ľeai lăhtarea.
Ţăni-n mănâ un ca cloput
Ş-tut asună ş-fudzi ndreptu.
Căti şapti…tutâ lumea
Bagâ mănʹili tut pri keptu.
Tuţ s-aplecă,s-trag din cali,
Nu-ari un s-ľi sta dininte.
Dzăcu:Sâ s-aproaki maşi di mini
Ş-am s-lu-adar eu s-ţănă minti.
Nu-nʹi ľeau ocľi iu si-duţi,
Căndu ia-ľea ninga mini.
Ţi-u mâc pânea, ţi-nʹi dzâc Kita,
Si-mi-asparim eu di tini?
Mut cârligu, nu-ľi dau oară,
Ş-pân si şuţă s-mi mutrească,
U mâcă , si-ľi facâ ghini,
Ună -n cap picurărească.
Ţe ţâ s-pari?, ľi-u-am atumţea,
Nu-aflaşi om si-ľi hibâ frică.
Ţăni minti: unui Kita,
Ţi cu dinţii ti disică.
El zgileaşti, iar alanţâ
S-sâlâghescu tuţ pri mini.
Vrea s-mi-acaţâ s-nʹi-umflâ kealea,
Nu vrea s-iasâ lucrul ghini.
Fuga Kita, fac atumţea,
Ş-pân s-dzăţi ţinţi ies dit hoară.
Fu ca zori pân loai dzeana,
A s-mi acaţă ei nafoară.
Dip kirută dusi ţeara.
Vream s-nʹi-agiutâ la furari
Ma, nu-ndreapsim, ved, cu ayiľi,
Eľi câfta, vahi, cama mari.
Ore, frate, ţi s-ľi-u dzâţim?
Nu-i trâ fugă di la oi.
Va s-ľi-ai lucrili curati
La biseariţi nu-i di noi.
RRI – Secţia Armâneascâ
Rubrica ndreaptă di: Taşcu Lala
Link-uri ti agiutor
Copyright © . All rights reserved